\n<\/p>\n
Mae cynnig opsiwn uniaith Saesneg o gofnod ysgrifenedig cyfarfodydd llawn y Senedd yn “gamarweiniol ac yn artiffisial” meddai arbenigwr ar ddwyieithrwydd.<\/b><\/p>\n
Ac ar wah\u00e2n, mae Cymdeithas yr Iaith yn beirniadu’r ffaith bod cofnod y pwyllgorau yn cynnwys cyfieithu Cymraeg i Saesneg yn unig.<\/p>\n
Dywedodd Comisiwn y Senedd – sy’n rhedeg y sefydliad o ddydd i ddydd – bod eu polisi cyfieithu yn “sicrhau gwasanaeth gwych a gwerth am arian i’r cyhoedd”.<\/p>\n
Mae Cofnod y Trafodion yn drawsgrifiad gair am air o gyfarfodydd llawn y Senedd pan mae’r 60 AS yn cwrdd yn y Siambr, ac o gyfarfodydd pwyllgorau, fel Hansard yn San Steffan.<\/p>\n
Ers 2016 mae’r Senedd yn cynnig yr opsiwn o ddarllen cofnod cyfarfodydd llawn yn Saesneg yn unig neu yn Gymraeg yn unig, yn ogystal \u00e2’r fformat dwyieithog.<\/p>\n
Rhwng 1999 a 2016 bu’r Cynulliad, fel yr oedd yn cael ei alw bryd hynny, yn darparu’r cofnod o gyfarfodydd llawn yn y fformat dwyieithog yn unig, sef yr ieithoedd mewn colofnau cyfochrog, gyda’r iaith a gafodd ei llefaru ar y chwith a’r cyfieithiad ar y dde.<\/p>\n
Os yw’r AS yn siarad Cymraeg mae’r cofnod yn ddwyieithog ar unwaith, ond ar gyfer cyfraniadau Saesneg rhaid aros hyd at dri diwrnod gwaith ar gyfer y fersiwn derfynol gwbl ddwyieithog.<\/p>\n
Dywedodd Dr Peredur Webb-Davies, uwch ddarlithydd mewn ieithyddiaeth ym mhrifysgol Bangor, y byddai’n “gwneud mwy o synnwyr i gael y fersiwn dwyieithog yn unig, am ei fod yn cyfleu amgylchedd ieithyddol y Senedd a Chymru, ac yn fwy defnyddiol”.<\/p>\n<\/div>\n